මිලාදුන් නබි දිනය පිළිවෙතින් සමරමු

අඳුරු රාත්‍රියකට උදෑසනක ආලෝකය උදාවන්නාක් මෙන්, මනුෂ්‍යත්වය අගාධ අඳුරක ගිලී සිටි යුගයකට ආධ්‍යාත්මික ආලෝකයක් රැගෙන පැමිණි ශ්‍රේෂ්ඨ මනුෂ්‍යයාණන් වහන්සේ නබි මුහම්මද් (සල් )තුමාණන්ය. එතුමාණන්ගේ උපත සිහිපත් කිරීම යනු හුදෙක් ඉතිහාසයේ සිදුවූ සිදුවීමක් සැමරීමක් නොවේ. එය අපගේ හදවත දෙස ආපසු හැරී බලන අවස්ථාවකි. “නබිතුමාණන්ගේ ජීවිතයෙන් මා අද කුමක් ඉගෙන ගෙන තිබේද? එතුමාණන්ගේ ගුණාංග මගේ ජීවිතය තුළ කොතරම් දුරට ජීවමාන වී තිබේද?” යන ප්‍රශ්න අපගෙන්ම විමසිය යුතු අවස්ථාවකි.

මිලාදුන් නබි දිනයේ සැබෑ අරුත ඇත්තේ සැරසිලි, උත්සව හෝ වචනවල පමණක් නොවේ. එහි සැබෑ අරුත ඇත්තේ නබිනායකයාණන්ගේ උතුම් ආදර්ශය අපගේ ජීවිතයට ගෙන ඒම තුළය.

නබිතුමාණන්ගේ උපත — මනුෂ්‍යත්වයට ලැබුණු ආලෝකයකි

නබි මුහම්මද් (සල්)තුමාණන් පැමිණියේ මිනිසුන් අතරින් මිනිසෙකු ලෙසය. එහෙත් එතුමාණන්ගේ චරිතය මනුෂ්‍යත්වයට උතුම්ම ආදර්ශයක් බවට පත්විය. අල්ලාහ්  සූභානහූව තා ආලා පවසන්නේ:

“නියත වශයෙන්ම අල්ලාහ් දෙවිඳුන්.ගේ දූතයාණන් තුළ ඔබට අලංකාර ආදර්ශයක් ඇත.” යනූවෙනි

— අල්-අහ්සාබ් 33:21

එබැවින් මිලාදුන් නබි දිනය සිහි කිරීමේදී අපගේ ප්‍රධාන අරමුණ විය යුත්තේ එම “අලංකාර ආදර්ශය” අපගේ ජීවිතයට ඇතුළත් කර ගැනීමයි.

නබිතුමාණන්ගේ උපත සිහි කිරීමේදී අපි එතුමාණන් උපන් දේශය ගැන කතා කරමු. එතුමාණන්ගේ ළමා කාලය ගැන කතා කරමු. එතුමාණන්ගේ මව්පියන් ගැනත්, ජීවිතයේ විවිධ අවස්ථා ගැනත් සිහිපත් කරමු. එහෙත් ඒ සියල්ලට වඩා වැදගත් වන්නේ එතුමාණන්ගේ චරිතය අප තුළ සදාතනික ආදර්ශයක් කොට උපදවා ගැනීමයි

සත්‍යවාදී බව — අපේ පළමු ආදර්ශය

නබිතුමාණන් නබිත්වයට පත්වීමට පෙර සිටම අල්-අමීන්, එනම් විශ්වාසවන්තයා ලෙස ප්‍රසිද්ධ වූහ. මිනිසුන්ට එතුමාණන් කෙරෙහි තිබූ විශ්වාසය එතුමාණන්ගේ වචනවලට පමණක් නොව, එතුමාණන්ගේ චරිතයට සම්බන්ධව මිනිසුන්ට දැනෙන්නට විය.

අද අප සමාජය මුහුණ දෙන බොහෝ ගැටලුවලට මුල් වී ඇත්තේ විශ්වාසය බිඳ වැටීමයි. ව්‍යාපාරයේදී වංචාව, සමාජ ජීවිතයේදී බොරුව, අන්තර්ජාලයේදී අසත්‍ය තොරතුරු, පුද්ගලික සබඳතාවලදී පොරොන්දු කඩ කිරීම — මේ සියල්ල මනුෂ්‍යත්වයේ විශ්වාසය දුර්වල කරයි.

මිලාදුන් නබි දිනය අපට මතක් කරන්නේ මෙයයි:

“නබිතුමාණන්ට ආදරය කරනවා නම්, අපේ වචනය විශ්වාස කළ හැකි වචනයක් බවට පත් කරමු.”

කරුණාව — නබිතුමාණන්ගේ හදවතේ භාෂාව

නබි මුහම්මද් (සල්)තුමාණන්ගේ ජීවිතය කරුණාවේ මහා පාඩමකි. දුප්පතාට, අනාථයාට, දරුවාට, කාන්තාවට, වයෝවෘද්ධයාට, අසරණයාට පමණක් නොව තමන්ට විරුද්ධ වූ අය කෙරෙහි පවා එතුමාණන්ගේ කරුණාව කරුණාවම විය  එකම කරුණාව විය

අල්ලාහ් සූභානහූව තා ආලා පවසන්නේ:

“අපි ඔබව ලෝකයන්ටම කරුණාවක් ලෙස පමණක් එවා ඇත්තෙමු.”

ඒ නිසා මිලාදුන් නබි දිනයේ අපි තවත් එක් ප්‍රශ්නයක් අපගෙන් ඇසිය යුතුය:

“මා සමඟ ජීවත් වන මිනිසුන්ට මගේ පැමිණීම සැනසීමක්ද— අල්-අන්බියා 21:107

නබිතුමාණන්ගේ මෙහෙවර කිසියම් පිරිසකට පමණක් නොව, සමස්ත මනුෂ්‍යත්වයට  උසස් ආදර්ශමත් විශ්වාසනීය දයාබරිත කරුණාවක් විය. එතුමා තම සතුරන්ටත් මිතුරන්ටත් එක ලෙසටම දයාවන්ත විය. කරුණාවන්ත විය.

අපගේ වචනයෙන් හෝ කෙනෙකුගේ හදවත නොබිඳීමත්, අසරණයෙකුට අත දීමත්, දුකින් සිටින කෙනෙකුට සවන් දීමත් නබිතුමාණන්ගේ ආදර්ශය ජීවමාන කිරීමකි.

සමාව දීම — ශ්‍රේෂ්ඨත්වයේ ලකුණ

මිනිසෙකුට අපහාස කළ විට අපහාසයෙන් පිළිතුරු දීම පහසුය. අයුක්තියකට කෝපයෙන් ප්‍රතිචාර දැක්වීම පහසුය. එහෙත් තමන්ට කළ වරදකට සමාව දීම සඳහා විශාල හදවතක් අවශ්‍යය.

නබිතුමාණන්ගේ ජීවිතය එවැනි සමාව දීමේ ආදර්ශවලින් පිරී ඇත. විශේෂයෙන් මක්කාව ජයගත් අවස්ථාවේ, වසර ගණනාවක් තමන්ට හා තම සහායකයන්ට පීඩා කළ බොහෝ දෙනෙකුට පළිගැනීම වෙනුවට කිසි පැකිලීමකින් තොරව සමාව දීම  එතූමන් තෝරා ගත්හ.

අද පවුල තුළ, මිතුරන් අතර, සමාජය තුළ ඇති ගැටලු බොහෝ විට දිග්ගැස්සෙන්නේ “පළමුව සමාව ඉල්ලන්නේ මම නොවෙමි” යන අහංකාර සිතුවිල්ල නිසා සහ මා සමාව පිරිනැමිය යුතූ නෑහැ යන අඩංගු සිතිවිල්ල නිසායනබිතුමාණන්ගේ ආදර්ශය අපට උගන්වන්නේ:

සමාව දීම දුර්වලකමක්.ලෙස නොවේ. එය හදවතේ අති මහත් ශක්තියක් වශයෙනි අසල්වැසියා සහ සමාජය

නබිතුමාණන්ගේ ඉගැන්වීම් තුළ අසල්වැසියාට විශේෂ ස්ථානයක් හිමි වේ. තමන්ගේ ආගමික වගකීම් ඉටු කරන අතරම තමන් අවට සිටින මිනිසුන්ගේ අයිතිවාසිකම් පිළිබඳවද අවධානය යොමු කළ යුතු බව එතුමාණන් ඉගැන්වූහ.

එබැවින් මිලාදුන් නබි සැමරුම අපගේ සමාජ ජීවිතයටද ආලෝකයක් විය යුතුය.

අපේ නිවසේ වැඩිහිටියන් සතුටින් සිටිනවාද?

අපේ අසල්වැසියාට අපෙන් කරදරයක් සිදුවනවාද?

අපේ ප්‍රදේශයේ අසරණ පවුලක් සිටිනවාද?

අපගේ වචනයෙන් කිසිවෙකුගේ හදවත බිඳී තිබේද?

මෙවැනි ප්‍රශ්නවලට පිළිතුරු සෙවීම නබිතුමාණන් සිහි කිරීමේ සැබෑ ක්‍රමයකි.

තරුණ පරපුරට නබිතුමාණන්ගේ ආදර්ශය

අද තරුණයා තොරතුරු තාක්ෂණය, සමාජ මාධ්‍ය, වේගවත් ජීවන රටාව සහ විවිධ ආකර්ෂණ අතර ජීවත් වේ. ඔහුට අවශ්‍ය වන්නේ හුදෙක් උපදේශයක් නොව, ජීවිතයට ආදර්ශයකි.

නබි මුහම්මද්( සල් )තුමාණන් තරුණයන් සමඟ කතා කළහ. ඔවුන්ට වගකීම් ලබා දුන්හ. ඔවුන්ගේ හැකියාවන් විශ්වාස කළහ. ඔවුන් සමාජයේ වැදගත් බලවේගයක් ලෙස සැලකූහ.

එබැවින් අද තරුණයෙකුට මිලාදුන් නබි දිනයේ ලැබිය යුතු පණිවිඩය විය යුත්තේ:

“ඔබේ වයස කුඩා වුවත් ඔබේ වගකීම කුඩා නොවේ.”

නබිතුමාණන්ගේ ආදර්ශය අනුගමනය කරන තරුණයා සමාජයට බරක් නොව, සමාජයට ආලෝකයකි.

පවුල තුළ නබිතුමාණන්ගේ ආදර්ශය

නබිතුමාණන්ගේ ශ්‍රේෂ්ඨත්වය පෙන්වූයේ දේශන වේදිකාව මත පමණක් නොවේ. පවුල තුළද එතුමාණන්ගේ උතුම් චරිතය ප්‍රකට විය.

අපගේ නිවසේ අපි කෙතරම් ආදරණීයද?

අපගේ දරුවන් අප සමඟ කතා කිරීමට බියද, සතුටුද?

අපගේ ජීවිත සහකරුට අප ගෞරව කරනවාද?

අපගේ දෙමාපියන්ට අපගේ වචන කරුණාවන්තද?

නබිතුමාණන්ගේ ආදර්ශය පෙන්වන්නේ ආගමිකත්වය පල්ලියට හෝ පූජනීය ස්ථානයකට සීමා නොවන බවයි. සැබෑ ආගමිකත්වය නිවසේ හැසිරීමෙන්ද ප්‍රකටවිය යුතුය.

සැබෑ මිලාදුන් නබි සැමරුම

අපි නිවාස අලංකාර කරමු. පහන් දල්වමු. නබිතුමාණන් පිළිබඳ දේශනා පවත්වමු. සලාතයත්, සලාම් දේශනයත් වැඩි කරමු. ආහාර බෙදා දෙමු. දුප්පතුන්ට උපකාර කරමු. මේ සියල්ල යහපත් කටයුතු වේ.

නමුත් මේ සියල්ලෙන් පසු අපගේ ජීවිතය පෙර මෙන්ම පවතින්නේ නම්, අප සැමරූ උත්සවයේ ගැඹුරු අරුත අපෙන් මගහැරී ඇත.

සැබෑ මිලාදුන් නබි සැමරුම යනු එක් දිනයක් තුළ නබිතුමාණන් සිහි කිරීම නොව, සෑම දිනයකම එතුමාණන්ගේ ආදර්ශය සිහි කරමින් ජීවත් වීමය.

• අපගේ දිව බොරුවෙන් පිරි නම් නබිතුමාණන් සිහි කිරීමේ අරුත අඩුවේ.
• අපගේ හදවත වෛරයෙන් පිරි නම් එතුමාණන්ගේ කරුණාව අප තුළ තවමත් ඉපදී නැත.
• අප අසල්වැසියාට හිංසා කරන්නේ නම් එතුමාණන්ගේ ආදර්ශය අපගේ ජීවිතයට පැමිණ නැත.
• අප අසරණයෙකු නොසලකා හරින්නේ නම්, එතුමාණන්ගේ දයාවේ පණිවිඩය අප හදවතට තවමත් ගැඹුරින් නොවැටහී ඇත.

එබැවින් මේ මිලාදුන් නබි දිනයේ අපි  අපෙන්ම පොරොන්දුවක් ගනිමු.

වචනයේදී සත්‍යවාදී වන්නෙමු.

හැසිරීමේදී කරුණාවන්ත වන්නෙමු.

වරදකදී සමාව දෙන්නෙමු.

අසරණයාට අත දෙන්නෙමු.

වැඩිහිටියාට ගෞරව කරන්නෙමු.

දරුවාට ආදරය කරන්නෙමු.

අසල්වැසියාට සැනසීමක් වන්නෙමු.

සමාජයට යහපතක් කරන්නෙමු.

එවිට අපගේ මිලාදුන් නබි සැමරුම වචනවලින් පමණක් නොව, අපගේ ජීවිතයෙන් ලියැවුණු සැමරුමක් බවට පත්වනු ඇත.

නබි මුහම්මද් (සල්) තුමාණන්ගේ උපත සිහි කිරීමේ උතුම්ම ත්‍යාගය වන්නේ එතුමාණන්ගේ ආදර්ශය අපගේ හදවත තුළ නැවත උපදවා ගැනීමයි.

අද අපට අවශ්‍ය වන්නේ නබිතුමාණන් ගැන කතා කරන මිනිසුන් පමණක් නොව, නබිතුමාණන්ගේ චරිතය තම ජීවිතයෙන් පෙන්වන මිනිසුන්ය.

එබැවින් මිලාදුන් නබි දිනයේ අපි මෙසේ අසමු:

“නබිතුමාණන් අප අතර අද ජීවත්ව සිටියා නම්, මගේ චරිතය දෙස බලා එතුමාණන් සතුටු වේද?”

එම ප්‍රශ්නයට අපගේ ජීවිතයෙන් ලැබෙන පිළිතුර යහපත් වන දිනය   සැබෑ මිලාදුන් නබි සැමරුම් දිනය  වග අප සිතහි ධාරණය කර ගනිමූ

සල්ලල්ලාහු අලෙයිහි වසල්ලම්.

අපි නබිතුමාණන් සිහි කරමු.

එතුමාණන්ට ආදරය කරමු.

එතුමාණන්ගේ ආදර්ශය ධාරණය කරමු.

එතුමාණන්ගේ කරුණාව සමාජයට බෙදා දෙමු.

මිලාදුන් නබි දිනය — සැමරුමක් පමණක් නොව, ජීවිතය වෙනස් කරගැනීමේ දිනයක් කරගනිමු.

සකස් කළේ

විශ්ව කලා ශ්‍රමික සංසදයේ සභාපති 

සහ මහනුවර විශ්වසවන්තයන්ගේ

සංගමයේ සභාපති  ප්‍රවීණ මාධ්‍යවේදී

සරත් කුමාර දුල්වල විසිනි.