හජ් වන්දනාව ඉටු කිරීමේ වගකීම හැකියාව පිළිබඳ ඉස්ලාමීය මගපෙන්වීම

සමස්තයේ සර්වබලධාරීයානන් වන්නේ අල්ලා දෙවිඳානන්ය. උන්වහන්සේ අති ශ්‍රේෂ්ඨය ආරම්භයත් අවසානයත් උන්වහන්සේමය උන්වහන්සේගේ නාමයට ගෞරවය වේවා !ප්‍රශංසා වේවා

හජ් වන්දනාව ඉස්ලාම් ආගම ඔසවා සිටින  කුලුනූ අතරින් පස්වන කුලුන වන අතර, එය සෑම ඉස්ලාම් භක්තිකයෙකුටම ජීවිතයේ අවම වශයෙන් වරක් ඉටු කළ යුතු උතුම් ආගමික කර්තව්‍යයක් ලෙස සැලකේ. කෙසේ වෙතත්, හජ් වන්දනාව අනිවාර්ය වන්නේ සියලු දෙනාට නොව, “හැකියාව ඇති” පුද්ගලයන්ට පමණක් ය. 

මේ හැකියාව යන සංකල්පය ඉස්ලාම් ආගම තුළ ගැඹුරු අර්ථයක් දරන අතර, එය ප්‍රධාන වශයෙන් ශාරීරික යෝග්‍යතාවය හා ආර්ථික හැකියාව යන අංශ දෙක මත පදනම් වේ.

ඉස්ලාම් ආගම මනුෂ්‍යයාගේ හැකියාවන් හා සීමාවන් සලකා බැලීමේ දයාවෙන් පිරි දර්ශනයක් වන අතර, කිසිවෙකුට තමන්ට නොහැකි දෙයක් ඉටු කිරීමට බල නොකරයි. 

කුරානයේ සඳහන් වන පරිදි, “අල්ලාහ් දෙවිඳුන් කිසිවෙකුට ඔහුට හැකි ප්‍රමාණයට වඩා බරක් නොපවරයි” යන මූලධර්මය හජ් වන්දනාවටද සෘජුව අදාළ වේ. එමඟින් හජ් වන්දනාව.ඉටූ කිරීමේ වගකීමේදී පුද්ගලයාගේ යථාර්ථ ජීවිත තත්ත්වයන් සැලකිල්ලට ගන්නා බව පැහැදිලි වේ.

ශාරීරික යෝග්‍යතාවය හජ් කිරීමේදී අතිශය වැදගත් අංගයකි. හජ් වන්දනාව යනු සරල වන්දනා ගමනක් නොව, ශාරීරිකව ශක්තිය හා ඉවසීම අවශ්‍ය වන ක්‍රියාවලියකි. දිගු දුර ගමන් කිරීම, උෂ්ණ කාලගුණය යටතේ දිගු වේලාවක් සිටීම, ජන සමාගම් අතර ගමන් කිරීම වැනි අභියෝගයන්ට මුහුණ දීමට සිදු වේ. ඒ නිසා, රෝගී තත්ත්වයන් ඇතිව හෝ වයස්ගතව හජ් වන්දනා කිරීම අපහසු නම්, එය අනිවාර්ය නොවේ. එවැනි අවස්ථාවල, වෙනත් පුද්ගලයෙකු හරහා හජ් (හජ් බදල්) ඉටු කිරීමකට ද ඉස්ලාම් ආගම තුළ අවසර ඇත.

(හජ් බදල් යනු, යම් පුද්ගලයෙකුට තමන්ම හජ් වන්දනාව ඉටු කිරීමට නොහැකි වූ විට, වෙනත් පුද්ගලයෙකු හරහා තම වෙනුවෙන් හජ් වන්දනාව ඉටු කරවා ගැනීමයි. “බදල්” යන වචනයේ අර්ථය “වෙනුවට” හෝ “ප්‍රතිස්ථානය” යන්නයි. එබැවින් හජ් බදල් යනු “තම වෙනුවෙන් වෙනත් කෙනෙකු විසින් සිදු කරන හජ්” ලෙස සරලව තේරුම් ගත හැක.)

තවද, ශාරීරික යෝග්‍යතාවය යනු සම්පූර්ණ සෞඛ්‍ය තත්ත්වයක් පමණක් නොව, මානසික සූදානමද ඇතුළත් වේ. හජ් වන්දනාව යනු ඉවසීම, විනය, හා ආත්ම පාලනය අවශ්‍ය කරන ආගමික වතාවතක් ඉටූ කිරීමකි එහිදී ඇතිවන අපහසුතා, තදබදය හා විවිධ තත්ත්වයන් සාර්ථකව පාලනය කිරීමට හෝ විඳ දරා ගැනීමට හැකි වීමද ශාරීරික හා මානසික යෝග්‍යතාවයේ කොටසක් ලෙස සැලකේ.

ආර්ථික හැකියාව හජ් වන්දනාව සිදු කිරීමේදී තවත් මූලික අංගයකි. හජ් වන්දනාව යනු විශාල වියදමක් අවශ්‍ය වන වන්දනා ගමනක් වන අතර, ගමන් වියදම්, නවාතැන්, ආහාර, සහ අනෙකුත් අවශ්‍යතා සඳහා මුදල් අවශ්‍ය වේ. එමනිසා, පුද්ගලයා තමන්ගේ සහ තම පවුලේ මූලික අවශ්‍යතා සපුරාලීමෙන් පසුව, ඉතිරි වන සම්පත් භාවිතයෙන් හජ්. වන්දනාව කිරීම කළ යුතුය. 

පවුලේ අවශ්‍යතා නොසලකා හජ් වන්දනාව කිරීම ඉස්ලාම් ආගම විසින් අනුමත නොකරයි.

ආර්ථික හැකියාව යන්නට ණය නොව, සම්පූර්ණයෙන්ම හලාල් ලෙස උපයාගත් ආදායමෙන් ලැබූ මුදල් භාවිතා කිරීමද ඇතුළත් වේ. ණය ගෙන හජ් වන්දනාව සිදු කිරීම හෝ අනීතික මාර්ගවලින් මුදල් සොයාගෙන හජ් වන්දනාව කිරීම ඉස්ලාම් ආගමේ ආත්මයට විරුද්ධ වේ. හජ් වන්දනාව යනු පිරිසිදු ආත්මයෙන් හා පිරිසිදු ආදායමෙන් සිදු කළ යුතු වන්දනා ගමනකි.

තවද, ආර්ථික හැකියාව තුළ ගමන් ආරක්ෂාව හා මාර්ගයේ සුරක්ෂිතතාවයද ඇතුළත් වේ. යම් කාලයක ගමන් කිරීම අනතුරුදායක නම් හෝ ජීවිතයට අවදානමක් ඇති නම්, එවැනි අවස්ථාවල හජ් වන්දනාව සිදුකිරීම  අනිවාර්ය නොවේ. 

මෙය ඉස්ලාම් ආගම මනුෂ්‍ය ජීවිතයට ලබා දෙන වටිනාකම පිළිබඳව පැහැදිලි කරන තවත් උදාහරණයකි.

සමස්තයෙන් බලන විට, හජ් වන්දනාව ඉටු කිරීමේ වගකීම යනු සරල අනිවාර්යයක් නොව, පුද්ගලයාගේ ශාරීරික හා ආර්ථික හැකියාවන් මත පදනම් වූ සාධාරණ හා දයාවෙන් පිරි ආගමික නීතියකි. එය මනුෂ්‍යයාගේ හැකියාවන් සලකා බැලීමෙන්, ඔහුට හැකි පරිදි අල්ලාහ් දෙවිඳුන්ට ආගමික කර්තව්‍යයන් ඉටු කිරීමට ඉඩ සලසයි.

අවසානයේ, හජ් වන්දනාව යනු හැකියාව ඇති අයට පමණක් අනිවාර්ය වන, නමුත් ඉටු කළහොත් අතිශය මහත් ආත්මීය ප්‍රතිලාභ ලබාදෙන වන්දනා ගමනකි එය ශාරීරික ශක්තිය, ආර්ථික ස්ථාවරත්වය, හා ආත්මීය කැපවීම එකට එකතු කරන උතුම් ආගමික අත්දැකීමක් වන අතර, එය ඉස්ලාම් ආගමේ සම්පූර්ණත්වය පෙන්වන වැදගත් කුලුනක් ලෙස සලකනු ලබයි.

විශ්ව කලා ශ්‍රමික සංසදය සහ 

මහනුවර විශ්වාසවන්තයන්ගේ සංගමයේ

සභාපති  ප්‍රවීණ ජ්‍යෙෂ්ඨ මාධ්‍යවේදී

සරත් කුමාර දූල්වල විසිනි.