අල් කුරානයේ සාම පණිවිඩය

 සමස්තයේ සර්ව බලධාරියානන් වන්නේ අල්ලාහ් දෙවිඳුන්ය. උන්වහන්සේ අති ශ්‍රේෂ්ඨය.ආරම්භයත් අවසානයත් උන්වහන්සේමය.නැමදීමට සුදුසු එකම මැවුම්කාර දෙවියන් වහන්සේය උන්වහන්සේට  ගෞරවය වේවා! ප්‍රශංසා වේවා!

සාමය පිළිබඳ ප්‍රධාන ආයත් සහ මිනිසාගේ වගකීම

අල් කුරානය යනු ඉස්ලාම් භක්තිකයන්ගේ ශුද්ධ වූ දිව්‍යමය ග්‍රන්ථය පමණක් නොව, මුළු මනුෂ්‍ය වර්ගයාටම මඟ පෙන්වන ජීවන මාර්ගෝපදේශයකි. එහි අඩංගු පණිවිඩ අතරින් ඉතා වැදගත් ස්ථානයක් හිමි වන්නේ සාමය, සහජීවනය, යුක්තිය සහ මානව ගෞරවය පිළිබඳ ඉගැන්වීම්වලටය. අල් කුරානයේ පණිවිඩය ගැඹුරින් අධ්‍යයනය කළ විට පැහැදිලි වන්නේ එය මිනිසාගේ හදවතේ සාමය ඇති කර, පවුලේ සාමය තහවුරු කර, සමාජයේ සංහිඳියාව ගොඩනඟා, ලෝක සාමය කරා මඟ පෙන්වන බවයි.

අල් කුර්ආනයේ සාමය පිළිබඳ ප්‍රබලතම පණිවිඩයක් සඳහන් වන්නේ සූරා අල්-බකරා 208 වන ආයතයේය:“අහෝ විශ්වාස කළවුනි! නුඹලා සම්පූර්ණයෙන්ම සාමයට (ඉස්ලාමයට) පිවිසෙන්න.”මෙම ආයතය මිනිසාට අර්ධ වශයෙන් නොව, සම්පූර්ණ ජීවිතයම සාමයේ මාර්ගයට යොමු විය යුතු බව උගන්වයි. සාමය යනු යුද්ධ නොමැති තත්ත්වයක් පමණක් නොව, හදවතේ සන්සුන්කම, සමාජයේ යුක්තිය සහ මිනිසාගේ සදාචාරාත්මක යහපත්කමද ඇතුළත් අපමණ අගයකින් යුත් පුළුල් සංකල්පයකි.

අල් කුර්ආනයේ තවත් වැදගත් ආයතයක් වන්නේ සූරා යූනුස් 25 වන ආයතයයි:

“අල්ලාහ් දෙවියන් සාමයේ නිවහන වෙත ආරාධනා කරයි.”

මෙම ආයතය මඟින් අල්ලාහ් දෙවිඳුන්ගේ අරමුණ වන්නේ මිනිසා සාමයේ ජීවිතයකට යොමු කිරීම බව පැහැදිලි වේ. අල්ලාහ් දෙවිඳුන් මිනිසාට වෛරය, අසාධාරණය සහ ගැටුම්වල මාර්ගය නොව, සාමය සහ යහපත්කමේ මාර්ගය පෙන්වයි.අභ්‍යන්තර සාමය පිළිබඳව අල් කුරානයේ ඉතා ප්‍රකට ආයතයක් වන්නේ සූරා අල්-රඅද් 28 වන ආයතයයි:

“සැබැවින්ම අල්ලාහ් දෙවිඳුන් සිහි කිරීමෙන් හදවත් සන්සුන් වෙති.”

අද ලෝකයේ මිනිසුන් මුහුණ දෙන මානසික ආතතිය, කනස්සල්ල සහ බිය හමුවේ මෙම ආයතය අතිශය වැදගත් පණිවිඩයක් ලබා දෙයි. සැබෑ සාමය ධනයෙන් හෝ බලයෙන් නොව,  සියල්ලේ නිර්මාතෘ සමඟ ඇති සබඳතාවයෙන් ලැබෙන බව මෙයින් පෙන්වා දෙයි.

අල් කුරානය මිනිස් ජීවිතයේ වටිනාකම පිළිබඳවද අතිශය උතුම් පණිවිඩයක් ඉදිරිපත් කරයි. සූරා අල්-මාඉදා 32 වන ආයතයේ මෙසේ සඳහන් වේ:

“යමෙක් එක් ජීවිතයක් බේරා ගන්නේ නම් ඔහු මුළු මනුෂ්‍ය වර්ගයාම බේරා ගත්තාක් මෙනි.”

මෙම ආයතය මිනිස් ජීවිතයට ඇති ගෞරවය ඉතා පැහැදිලිව ප්‍රකාශ කරයි. මනුෂ්‍ය ජීවිතය රැක ගැනීම, ආරක්ෂා කිරීම සහ ගෞරව කිරීම ඉස්ලාමයේ මූලික වගකීමකි.

අන්‍ය ආගම් සහ ජාතීන් සමඟ සහජීවනය පිළිබඳවද අල් කුරානය උතුම් මඟපෙන්වීමක් ලබා දෙයි. සූරා අල්-හුජුරාත් 13 වන ආයතයේ මෙසේ සඳහන් වේ:

“අහෝ මනුෂ්‍යයෙනි! අපි නුඹලා පුරුෂයෙකුගෙන් සහ කාන්තාවකගෙන් මැවූවෙමු. තවද නුඹලා එකිනෙකා හඳුනා ගැනීම සඳහා විවිධ ජන කොටස් හා ගෝත්‍ර බවට පත් කළෙමු.”

මෙම ආයතය විවිධත්වය ගැටුමකට හේතුවක් නොව, එකිනෙකා අවබෝධ කර ගැනීමට ඇති අවස්ථාවක් බව උගන්වයි. එය ජාතිවාදය, වර්ගවාදය සහ අසහනය ප්‍රතික්ෂේප කරන විශ්වීය පණිවිඩයකි.

අල් කුරානය යුක්තිය සහ සාමය අතර ඇති සම්බන්ධතාවයද අවධාරණය කරයි. සූරා අන්-නිසා 135 වන ආයතයෙහි:

“යුක්තිය ස්ථාපිත කරන්නන් වන්න.”

යුක්තිය නොමැති තැන සැබෑ සාමය පැවතිය නොහැක. අසාධාරණය, පීඩනය සහ වෙනස්කම් කිරීම සමාජ අසහනයට හේතු වේ. එබැවින් යුක්තිය රැකීම සාමය තහවුරු කිරීමේ මූලික පියවරකි.

මෙම දිව්‍යමය පණිවිඩයන් හමුවේ මිනිසාට විශාල වගකීම් කිහිපයක් පැවරේ. පළමුව, තම හදවත තුළ සාමය ගොඩනැගීම ඔහුගේ වගකීමකි. වෛරය, ඊර්ෂ්‍යාව, කෝපය සහ පළිගැනීම වැනි ගුණාංග දුරු කර, කරුණාව, ඉවසීම සහ සමාව වර්ධනය කළ යුතුය.

දෙවනුව, පවුල තුළ සාමය ඇති කිරීම මිනිසාගේ වගකීමකි. දෙමාපියන්ට ගෞරව කිරීම, දරුවන්ට ආදරය කිරීම සහ පවුලේ සාමාජිකයන් අතර සහයෝගීතාව වර්ධනය කිරීම කුරානීය ඉගැන්වීම්වල කොටසකි.

තෙවනුව, සමාජයේ සාමය ආරක්ෂා කිරීම මිනිසාගේ වගකීමකි. අසල්වැසියන්ට යහපත් ලෙස සැලකීම, දුප්පතුන්ට උපකාර කිරීම, අසාධාරණකම්වලට එරෙහිව නැගී සිටීම සහ සත්‍යය වෙනුවෙන් පෙනී සිටීම සාමකාමී සමාජයක් ගොඩනැගීමට අත්‍යවශ්‍ය වේ.

සිව්වනුව, විවිධ ආගම් සහ ජාතීන් අතර සංහිඳියාව වර්ධනය කිරීමද වැදගත් වගකීමකි. අල් කුරානයේ ඉගැන්වීම් අනුව මිනිසා අන් අයට ගෞරව කළ යුතු අතර, සංවාදය සහ අවබෝධය මඟින් ගැටුම් විසඳීමට උත්සාහ කළ යුතුය.

අවසාන වශයෙන්, අල් කුරානයේ සාම පණිවිඩය යනු හුදෙක් න්‍යායාත්මක ඉගැන්වීමක් නොව, ජීවිතයේ සෑම අංශයකම ක්‍රියාත්මක කළ යුතු ජීවන මාර්ගයකි. අල්ලාහ් දෙවිඳුන් මිනිසාට සාමයේ නිවහන වෙත ආරාධනා කරන අතර, එම ආරාධනයට ප්‍රතිචාර දැක්වීම මිනිසාගේ වගකීම වේ. හදවතේ සාමය, පවුලේ සාමය, සමාජයේ සාමය සහ ලෝක සාමය ගොඩනැගීම සඳහා කුරානය ලබා දෙන මඟපෙන්වීම අනුගමනය කිරීම අද ලෝකයට අතිශයින්ම අවශ්‍ය වේ. එබැවින් අල් කුරානය සැබැවින්ම මනුෂ්‍ය වර්ගයාට සාමය, යුක්තිය සහ සංහිඳියාව කරා මඟ පෙන්වන දිව්‍යමය ප්‍රකාශනයක් බව නිසැකය.

සකස් කළේ

විශ්ව කලා ශ්‍රමික සංසදයේ සභාපති 

සහ මහනුවර විශ්වසවන්තයන්ගේ

සංගමයේ සභාපති  ප්‍රවීණ මාධ්‍යවේදී

සරත් කුමාර දුල්වල විසිනි.