මොහොමඩ් නබිතුමාගේ සාමකාමී චරිතය

 සමස්තයේ සර්ව බලධාරියානන් වන්නේ අල්ලාහ් දෙවිඳුන්ය. උන්වහන්සේ අති ශ්‍රේෂ්ඨය.ආරම්භයත් අවසානයත් උන්වහන්සේමය.නැමදීමට සුදුසු එකම මැවුම්කාර දෙවියන් වහන්සේය උන්වහන්සේට  ගෞරවය වේවා! ප්‍රශංසා වේවා!

මානව ඉතිහාසයේ ලෝකයට සාමය, කරුණාව, යුක්තිය සහ සහෝදරත්වය පිළිබඳ උතුම් ආදර්ශයක් ලබා දුන් ශ්‍රේෂ්ඨතම චරිත අතරින් මොහොමඩ් නබිතුමා ප්‍රමුඛ ස්ථානයක් ගනී. එතුමාගේ මුළු ජීවිතයම මනුෂ්‍ය වර්ගයාට සාමකාමී ජීවන රටාවක ආදර්ශයක් විය. 

විශේෂයෙන් මක්කා සහ මදීනා යන ප්‍රදේශවල ජීවත් වූ  අවධි දෙක තුළ එතුමාගේ හැසිරීම, ඉවසීම, සමාව දීම සහ සංහිඳියාව සඳහා කළ කැපවීම ඉස්ලාමයේ සැබෑ ආත්මය පැහැදිලි කරයි.

නබිතුමා උපත ලැබුවේ අරාබි දේශයේ මක්කා නගරයේය. එවකට අරාබි සමාජය ගෝත්‍රවාදය, අසාධාරණකම්, පළිගැනීම් සහ සමාජ අසමතුලිතතා වලින් පිරී තිබුණි. එවැනි පරිසරයක් තුළ පවා එතුමා කුඩා කල සිටම අවංක, විශ්වාසවන්ත සහ යහපත් චරිතයකින් යුතුව ජීවත් වූහ. මක්කා වැසියන් එතුමාට අල්-අමීන් (විශ්වාසවන්තයා) සහ අස්-සාදික් (සත්‍යවාදියා) යන ගෞරවනීය නාමයන් ලබා දුන්නේ එම නිසාය.

වයස අවුරුදු හතළිහේදී අල්ලාහ් දෙවිඳුන්ගේ දූත මෙහෙවර ලැබූ නබිතුමා ජනතාවට එකම දෙවියන් වහන්සේ පිළිබඳ පණිවිඩය දේශනා කළහ. එහෙත් එම පණිවිඩය පිළිගැනීමට මක්කාහි නායකයන් කැමති නොවූහ. ඔවුහු නබිතුමාටත්, එතුමාගේ මුල් අනුගාමිකයන්ටත් දැඩි හිංසා පීඩා කළහ. අපහාස කළහ, ගල් ගැසූහ, සමාජ වර්ජනයට ලක් කළහ, ආර්ථික වශයෙන් පීඩනයට පත් කළහ.

මෙවැනි දුෂ්කර තත්ත්වයන් හමුවේ නබිතුමා කිසි විටෙකත් වෛරයෙන් හෝ ප්‍රචණ්ඩත්වයෙන් ප්‍රතිචාර දැක්වූයේ නැත. 

එතුමාගේ ආකල්පය වූයේ ඉවසීම, ප්‍රාර්ථනය සහ යහපත් හැසිරීමයි. 

අල් කුර්ආනයේ උපදෙස් අනුව නපුරට යහපතින් පිළිතුරු දීමට එතුමා උත්සාහ කළහ. මෙය සාමකාමී නායකත්වයේ අතිවිශිෂ්ට උදාහරණයකි.

නබිතුමාගේ සාමකාමී චරිතය පැහැදිලි කරන වැදගත් සිදුවීමක් වන්නේ තාඉෆ් නගරයේ සිද්ධියයි. එහි ජනතාව එතුමාගේ දේශනාව ප්‍රතික්ෂේප කරමින් ගල් ගසා තුවාල කළහ. එවිට දේවදූතයා ඔවුන් විනාශ කිරීමට අවසර ඉල්ලා සිටියද, නබිතුමා එයට එකඟ නොවීය. ඒ වෙනුවට, “ඔවුන් නොදන්නා නිසා මෙසේ කරති” යැයි පවසා ඔවුන් වෙනුවෙන් යහපත ප්‍රාර්ථනා කළහ. මෙය කරුණාව සහ සමාව පිළිබඳ අති උතුම් ආදර්ශයකි.

පසුව නබිතුමා සහ එතුමාගේ අනුගාමිකයන් මදීනා නගරයට හිජ්රත් කළහ. මදීනා අවධිය නබිතුමාගේ රාජ්‍ය නායකත්වය සහ සමාජ ගොඩනැගීමේ කාලය විය. එහිදී එතුමා පළමුව කළේ විවිධ ආගම් සහ ගෝත්‍ර අතර සාමකාමී සහජීවනය තහවුරු කිරීමයි.

මදීනාහි මුස්ලිම්වරුන්, යුදෙව්වන් සහ වෙනත් ජන කොටස් අතර සම්මුතියක් ලෙස සකස් කරන ලද මදීනා ප්‍රඥප්තිය ලෝක ඉතිහාසයේ මුල්ම ලිඛිත සමාජ ගිවිසුම්වලින් එකක් ලෙස සැලකේ. එමඟින් සියලු ජන කොටස්වල ආගමික නිදහස, ආරක්ෂාව සහ අයිතිවාසිකම් තහවුරු කරන ලදී. මෙය නබිතුමාගේ සාමකාමී රාජ්‍ය පාලනයේ විශිෂ්ට උදාහරණයකි.

නබිතුමාගේ ජීවිතයේ තවත් වැදගත් සිදුවීමක් වන්නේ හුදයිබියා සම්මුතියයි. ඉස්ලාම් භක්තිකයන්ට අවාසිදායක බවක් පෙනුණු ඇතැම් කොන්දේසි තිබුණද, ලේ වැගිරීම් වළක්වා ගැනීම සහ දිගුකාලීන සාමය ස්ථාපිත කිරීම සඳහා නබිතුමා එම ගිවිසුම පිළිගත්හ. එය පසුව ඉස්ලාමයේ ව්‍යාප්තියටත්, අරාබි සමාජයේ ස්ථාවරත්වයටත් විශාල බලපෑමක් ඇති කළේය. මෙයින් පැහැදිලි වන්නේ එතුමා ප්‍රචණ්ඩත්වයට වඩා සාමකාමී විසඳුම් අගය කළ බවයි.

නබිතුමාගේ සාමකාමී චරිතයේ උච්චතම අවස්ථාව ලෙස සැලකෙන්නේ මක්කා ජයග්‍රහණයයි. වසර ගණනාවක් තිස්සේ තමන්ට හිංසා කළ, තම අනුගාමිකයන් පීඩාවට පත් කළ, තමන්ව මරණයට පවා සැලසුම් කළ මක්කා නායකයන් එදා නබිතුමාගේ බලය යටතට පත් වූහ. සාමාන්‍ය නායකයෙකු නම් පළිගැනීමට උත්සාහ කළ හැකි වුවද, නබිතුමා එසේ නොකළහ.

එතුමා මක්කා වැසියන් අමතා මෙසේ පැවසූහ: “අද ඔබලාට කිසිදු දෝෂාරෝපණයක් නැත. ඔබලා සියලු දෙනා නිදහස්ය.” මෙම සමාව දීමේ ප්‍රකාශය ලෝක ඉතිහාසයේ ශ්‍රේෂ්ඨතම සංහිඳියා ක්‍රියාවක් ලෙස සැලකේ. 

වෛරය වෙනුවට සමාව තෝරා ගැනීමෙන් එතුමා සැබෑ ජයග්‍රහණය පෙන්වා දුන්හ.

නබිතුමා තම අනුගාමිකයන්ට ද සාමය පතුරුවන ලෙස උපදෙස් දුන්හ. “ඔබ අතර සාමය පතුරුවන්න” යන එතුමාගේ ඉගැන්වීම මුස්ලිම් සමාජයේ මූලික වටිනාකමක් බවට පත්විය. 

අසල්වැසියන්ට යහපත් වීම, දුප්පතුන්ට උපකාර කිරීම, දුර්වලයන් ආරක්ෂා කිරීම සහ අන් අයට ගෞරව කිරීම එතුමා නිරන්තරයෙන් දේශනා කළ කරුණු විය.

අවසාන වශයෙන්, මොහොමඩ් නබිතුමාගේ මක්කා සහ මදීනා ජීවිතය දෙස බලන විට එතුමාගේ චරිතයේ මූලික ලක්ෂණ වූයේ ඉවසීම, කරුණාව, සමාව, යුක්තිය සහ සාමය බව පැහැදිලි වේ. 

එතුමා පීඩාවට පත් වූ විට පළි නොගත්හ; බලය ලැබූ විට අහංකාර නොවූහ; ජයග්‍රහණය කළ විට වෛරය පතුරුවා නොහැර සමාව දුන්හ. එබැවින් නබිතුමාගේ ජීවිතය සාමකාමී නායකත්වයේ සහ මානව සංහිඳියාවේ සදාතනික ආදර්ශයක් වන අතර, අද ලෝකයට ද ඉතා වටිනා මඟපෙන්වීමක් සපයයි.

සකස් කළේ

විශ්ව කලා ශ්‍රමික සංසදයේ සභාපති 

සහ මහනුවර විශ්වසවන්තයන්ගේ

සංගමයේ සභාපති  ප්‍රවීණ මාධ්‍යවේදී

සරත් කුමාර දුල්වල විසිනි.